| | |

Rannsókn á viðhorfum til búsetu á landsbyggðinni

„Hver telur þú að sé stærsta ógnin sem blasir við sveitarfélaginu um þessar mundir?“ Þetta er ein fjölmargra spurninga sem þátttakendur í rannsóknarverkefni um viðhorf til búsetu á landsbyggðinni koma til með að svara á næstunni. Niðurstöður rannsóknarinnar gefa innsýn í hvort munur sé á viðhorfum til búsetu á landsbyggðinni eftir því hvar fólk býr, eða hvort að viðhorfin séu óháð búsetu og stjórnist af öðrum þáttum. Þátttakendur leggja því sitt af mörkum til að skapa tækifæri til þessarar greiningar.



Þessa dagana eru tæplega tvö þúsund manns á tveimur mismunandi landssvæðum á Íslandi að fá í hendurnar bréf frá Rannsókna- og fræðasetri Háskóla Íslands á Vestfjörðum. Könnunin er rannsóknarverkefni Albertínu Friðbjargar Elíasdóttur.

Þau tvö landsvæði sem um ræðir eru þrjú sveitarfélög á norðanverðum Vestfjörðum annars vegar og þrjú sveitarfélög á Suðurlandi hins vegar. Könnunin fer þannig fram að bréf var sent út til þátttakenda, en könnunin sjálf fer fram á netinu, þ.e. þátttakendur þurfa að fara inn á uppgefna netslóð og svara spurningalistanum þar.

Vonast er eftir að sem flestir sjái sér fært um að svara könnuninni, en eftir því sem fleiri svara fást nákvæmari niðurstöður. Minnt er á að svarfrestur er til 14. júní.