| | |

Fyrirtækjaheimsóknir og íbúaþing á Flateyri


Atvinnumálanefnd Ísafjarðarbæjar og Atvest standa sameiginlega fyrir fyrirtækjaheimsóknum og íbúaþingi um atvinnumál á Flateyri, þriðjudaginn 24 febrúar n.k. Þetta er liður í röð heimsókna og íbúaþinga á norðanverðum Vestfjörðum. Með þessu móti fara saman áherslur Atvest um formlegar fyrirtækjaheimsóknir og stefna Atvinnumálanefndar að leita eftir hugmyndum og skoðunum almennings. Samskonar íbúaþing og fyrirtækjaheimsóknir munu svo vera á Þingeyri, Suðureyri og Ísafirði. Að loknum öllum íbúaþingum verður haldin ráðstefna á Ísafirði þar sem helstu niðurstöður íbúaþinganna verða kynntar og dregin upp mynd af tækifærum og ógnunum í atvinnulífi á norðanverðum Vestfjörðum.

Yfirskrift íbúaþingsins er: Hvernig verður Flateyri eftir 5-10 ár? Þar munu fulltrúar atvinnumálanefndar og Atvest halda stutt erindi, en síðan verður þátttakendum gefið færi á að starfa í vinnuhópi þar sem unnið verður undir eftirfarandi formerkjum:


• Atvinnuþróun, nýsköpun
• Stjórnsýsla, skipulag og aðkoma að atvinnulífi
• Samfélagið og framtíðin

Íbúaþingið er öllum opið og vonast aðstandendur þess til að sem flestir mæti þannig að umræðan gefi sem besta mynd af skoðunum og hugmyndum íbúa á Flateyri.

Íbúaþingið verður haldið í Félagsbæ, Hafnarstræti 11 og stendur frá kl 16:00 til 19:00. Þátttöku má gjarnan tilkynna í síma 450-3000 eða á atvest@atvest.is

Allar nánari upplýsingar gefa Hálfdán Bjarki hjá Ísafjarðarbæ í síma 450-8000 og Ásgerður hjá Atvest í síma 450-3000.